Londres (E.P.) .- La entidá británica Barclays tien previsto suprimir 15.000 puestos de trabayu en tol mundu, cifra superior al rangu d'ente 10.000 y 12.000 qu'anunciara de primeres, como parte de la nueva estratexa que va presentar esti xueves, según adelanta la BBC.

   Según la cadena británica, hasta'l 70% de los puestos suprimíos van ser nel Reinu Uníu, y, anque van afectar principalmente al negociu de banca d'inversión, les sos operaciones nel sector minorista nun van ser inmunes a esti retayu.

   Al paecer, el conseyeru delegáu de Barclays, Antony Jenkins, quier amenorgar la plantiya global nos próximos seis años dende les 140.000 persones que trabayen nesti momentu nel bancu hasta sobre 100.000.

   Nesti contestu, ye probable que la entidá tamién baxe'l so númberu de sucursales dende les 1.600 coles que cuenta nesti momentu hasta les 1.200 nos próximos meses, anque nun s'espera qu'esti anunciu seya inminente.

   Na nueva estratexa que va presentase esti xueves, tola atención va centrase nel negociu de banca d'inversión, que se vio afectáu una ralentización de la demanda de deuda, tanto pública como privada.

   Barclays llogró un beneficiu netu atribuyíu por importe de 965 millones de llibres esterlines (1.177 millones d'euros) al zarru del primer trimestre del añu, lo que supón una meyora del 15% respectu al mesmu periodu del 2013.

   Sicasí, los ingresos netos por operaciones de Barclays nos trés primeros meses del añu sumaron un total de 6.221 millones de llibres (7.585 millones d'euros), un 8,2% perbaxo del datu del mesmu periodu del 2013. En concreto, en banca d'inversión cayeron un 28%, debío principalmente al descensu del 41% na comercialización de bonos.