Bruxeles (E.P.) .-La Comisión Europea revisó a l'alza esti llunes la so previsión de crecimientu pa España hasta dexala nel 1,1% del PIB esti añu -una décima más de lo que previó en febreru, anque perbaxo del 1,2% que calcula'l Gobiernu de Mariano Rajoy- y nel 2,1% nel 2015 -cuatro décimes más que nel anterior pronósticu y penriba del 1,8% que prevé'l Gobiernu-. La tasa de paru nun va baxar del 24% y España va incumplir l'oxetivu de déficit del añu qu'entra si nun adopta nueves midíes.
Con esta meyora, España va crecer esti añu casi en llinia cola media de la eurozona (1,2%) y va superar de sobra nel 2015 el promediu de los sos socios del euru (que va quedar nel 1,7%). Pal conxuntu de la UE, Bruxeles prevé una meyora del 1,6% esti añu y del 2% nel 2015. Ente los grandes países de la eurozona, Alemaña ye líder (con un crecimientu del 1,8% esti añu y del 2% nel 2015), mientres qu'España supera tanto a Francia (1% y 1,5%, respectivamente), como Italia (0,6% y 1,2%).
"La nidia recuperación económica n'España va ganar puxu mientres una meyora de la confianza y una relaxación adicional de les condiciones financieres, dao que la reducción de la prima de riesgu y les meyores condiciones de financiación pal Tesoru y los bancos tán repercutiéndose gradualmente a los prestatarios últimos", resalta l'informe del Executivu comunitariu, qu'almite sicasí que les pymes siguen teniendo problemes p'acceder al creitu.
Les esportaciones caltendránse fuertes, pero la demanda doméstica va tomar el relevu como principal motor de crecimientu. El consumu priváu va acelerase progresivamente gracies a la meyora del empléu y a la baxa inflación y tamién meyora la inversión n'equipu. En contraste, el sector de la construcción va siguir amenorgándose nel 2014.
En cuanto al paru, Bruxeles prevé que se reduza, pero 2va siguir siendo altu". Ello ye que l'Executivu comunitariu meyora lixeramente les sos previsiones sobre la tasa de paru, que va quedar de media nel 25,5% esti añu (frente al 25,7% nel so anterior pronósticu) y nel 24% nel 2015 (frente al 24,6%). Sicasí, estes cifres son tovía peores que les que presentó'l Gobiernu la selmana pasada nel so cuadru macroeconómicu (24,9% y 23,3%, respectivamente).
Anque la productividá se desacelerará nel 2014, la moderación salarial va permitir, según Bruxeles, una sele reducción adicional de los costos llaborales unitarios y meyores de la competitividá mientres los próximos dos años. La inflación va caltenese bien baxa (nel 0,1% de media nesti añu y nel 0,8% nel 2015) por cuenta de la débil demanda y a la cayida nos precios de la enerxía.
MÁS DÉFICIT POL CÉNTIMU SANITARIU
La meyora de les previsiones económiques y los axustes yá adoptaos pol Gobiernu van facer que'l déficit públicu baxe esti añu, gracies sobremanera a un menor gastu, hasta'l 5,6% del PIB (en llugar del 5,5% que calcula'l Gobiernu, pero perbaxo en tou casu del oxetivu del 5,8% pactáu cola UE). El pagu d'intereses va siguir aumentando, pese a la reducción de tipos, pola subida del volume de delda. Pela so parte, les tresferencies sociales van baxar nel 2014 pola cayida del paru y el cambiu del sistema de indexación de les pensiones.
L'Executivu comunitariu calcula que dos midíes recientes van aumentar nun 0,1% el déficit nel 2014. De primeres, la devolución de parte de lo recaudao col denomináu 'céntimu sanitario', declaráu illegal pol Tribunal de Xusticia de la UE. De segundes, la tarifa plana de 100 euros na cotización a la seguridá social pa contratos indefiníos, qu'entró en vixencia en febreru del 2014 y va tar vixente hasta últimos d'añu.
Si nun s'adopten nuevos axustes, el déficit volverá disparase hasta'l 6,1% del PIB nel 2015, frente al oxetivu del 4,2% pactáu cola UE. Esta proyección asume que la subida del IRPF aprobada pol Gobiernu de Mariano Rajoy n'avientu del 2011 acaba a últimos d'esti añu.
Los grandes déficits públicos y el baxu crecimientu nominal del PIB van provocar que la deuda pública supere yá'l 100% del PIB esti añu y raspie'l 104% nel 2015 (frente al 99,5% y el 101,7% que prevé'l Gobiernu).
FOTO: EUROPA PRESS
