Uviéu (Europa Press) .- El xuiciu de faltes contra nueve persones acusaes d'amenazar a la diputada nacional del PP Carmen Maniega n'Uviéu, celebráu nel xulgáu d'instrucción númberu 4, quedó vistu pa sentencia dempués de la vista celebrada esti llunes. Nueve persones vinculaes a la Plataforma d'Afectaos poles Hipoteques (PAH-Asturies) son los imputaos y negaron que ficieren amenaza dalguna.

   Los fechos remóntense al 16 de marzu del 2013, cuando delles persones realizaron un escrache a la diputada nacional nel so trayectu dende la sede de la Procuradoría Xeneral hasta la Xunta del Principáu.

   Na vista ante'l xuez d'esti llunes, Carmen Maniega ratificóse na denuncia que formuló nel so día polos fechos y dixo que se sintió "amenazada" polos integrantes de la PAH.

   La versión de los acusaos ye bien distinta y afirmaron que nun hubo violencia alguna, dao que lo único que-y pidíen ye qu'apoyara una iniciativa llexislativa popular sobre los desahucios. "Si tan amenazada se sentía tenía de llamar a la Policía y nun tomar daqué nuna cafetería, que foi lo que fizo", manifestó ún de los imputaos a Europa Press.

   Aseguraron que la PAH siempre tuvo en contra de la violencia verbal o física. Tamién esplicaron que l'abogáu de Carmen Maniega nin siquier intervino nin fizo preguntes nel xuiciu. "Ye representativo", comentaron. A lo último, esplicaron qu'una de les persones imputaes nin siquier participó na acción.

FOTO: Europa Presss