Dulce María Gil, Paulo Arboleya y Arturu Xosé Bermeyu, con Xicu Xabel Fernandi y María Sonia Díaz de suplentes, son los candidatos d'Andecha Astur nestes elleiciones europees y ayeri fixeron la so presentación nun actu nel que solliñaron les direutrices que marcarán el trabayu n'Europa: la xusticia social, llibertaes democrátiques, la defensa de la soberanía de los pueblos y la defensa de la Europa de los Pueblos y les presones frente a la Europa del capital.

 

Andecha Astur destacó'l llabor que vien faciendo a nivel européu dende va años, un trabayu a llargu plazu que permitió llevar nel so momentu a la xunión europea xabazaes mediu ambientales comu les mines a cielu abiertu, o la represión llingüística y qu'agora mesmo permitió sacar a la lluz el fraude n'El Musel, dempués d'una denuncia puesta hai 6 años."N'Andecha trabayamos con visión de futuru y sabiendo que lo que facemos güei guañará nun futuru prósimu. En política nun podemos cayer nel imediatismu, nin creyer en millagros, solo na coherencia y el trabayu firme" afirmó Dulce María Gil.

 

Asina mesmo, y col enfotu  d'algamar  l'eurodiputáu que pronostiquen les encuestes, Andecha Astur tien ellaborada una planificación d'intervenciones nel Parllamentu européu dende onde defender los intereses del Pueblu Asturianu y onde denunciar les polítiques antisociales, de falta de llibertaes democrátiques, d'esfarrapamientu industrial, de desigualdá, discriminación, racismu, represión llingüística... too ello dende la defensa clara del drechu al autodetermín de los pueblos y el nuesu compromisu cola superanza del modelu socio-económicu que rixe na Xunión Europea.