“1979: Revolución” ye un nuevu conceptu de xuegu que pretende, en xunto, entretener y educar sobre l’eventu hestóricu que cambió Irán y dio nacimientu a la República Islámica. L’ambiciosu proxectu, en marcha dende va tres años, pretende llanzase la seronda entrante y tien detrás al famosdu director, actor, guionista y productor de videoxuegos canadiense Navid Khonsari, d’orixen iraní y coautor de los exitosos “The Grand Theft Auto”, “Max Payne” o “The Warriors”.

Alredor de la metada de la quincena de dibuxantes que tien collaborao en “1979” son iraníes, la mayoría d’ellos xóvenes que participen de forma anónima dende Irán mesmo. Dellos tuvieron d’abandonar el país al temer pola so seguridá tres de participar nun proxectu qu’amuesa’l llau escuru de la revolución islámica y cómo ésta volvióse escontra dellos delos sectores que la impulsaron.

A diferencia de la práctica totalidá de los videoxuegos d’acción, en “1979” el xugador nun avanza a base de pegar tiros y matar enemigos. Va vese metíu na piel de Reza, un xoven estudiante y fotógrafu que nun primer momentu apoya la revolución que depuso al últimu Shah de Persia, Mohamed Reza Pahlavi, pero que llueu ve como ésta tórnase escontra de los que nun pretendíen l’establecimientu d’una teocracia.

Esti xuegu ta construyíu riba les experiencies de xente que vivió, participó y sufrió l’impactu de lña revolución islámica y ye, al entender del creador, revolucionariu por varios motivos, pero fundamentalmente porque nun tresllada al xugador a un mundu de fantasía, sinon que s’enmarca na hestoria real.