La formación nacida en Lluanco, el Coro León de Oro, ta acabante de ganar esta mesma tarde’l Primer Festival Internacional de Londres de Coros A Capella. Trátase de la principal cita coral a concursu del añu y vien teniendo llugar en Londres a lo llargo de tola selmana, contando cola participación de delles de les principales agrupaciones corales del mundu.

Nel día d’ayeri llegaba la noticia de que la formación lluanquina pasada a la final, xunto al cor Constanza Porta d’Italia, The Erebus Ensemble del Reinu Xuníu y la coral Voces Musicales d’Estonia. Frente a toos ellos, con una magnífica interpretación final, el Coro León de Oro upóse col primer premiu, lo que los convierte nún de los meyores coros del mundu.

Esta formación coral fundárase en Lluanco va más d’una década y, lo qu’entamara como un pequeñu grupu d’amigos apasionaos del cantu coral, camudó nun sólidu proxectu qu’aína se reveló como una referencia n’España y nel extranxeru, como asina refrenden los constantes galardones ya invitaciones y l’éxtu descomanáu de públicu y crítica.

La formación destaca pola so versatilidá en cuantes a repertoriu y plantilla, lo que lu permite ufrir tou tipu de conciertos (coru mixtu, grupu vocal de cámara, coru femenín y coru masculín) con un ampliu repertoriu qu’abarca dende los maestros del Renacimientu y Barrocu hasta les obres corales más vanguardistes, tanto a capella como con orquesta, como demuestren les fructíferes collaboraciones con formaciones como la Orquesta Sinfónica del Principáu d’Asturies, la Oviedo Filarmonía o la Orquesta Sinfónica de Bilbao.