Fadrá por aniciar un bloque soberanista dientru'l mesmu.

Énte esti 1 de Mayu, Andecha Astur quier denunciar una vuelta más cómu les polítiques aplicaes pol Estáu español n'Asturies, primero comu estratexa estatalista y agora amestándose-y les desixencies de la "Troika", tan llevando al Pueblu Asturianu a una situación de desesperu ensin precedentes, con más de 100.000 presones en paru, con decenes de miles d'asturianos y asturianes que se ven obligaes a emigrar, y cola precariedá llaboral comu alternativa pa los afortunaos que puen allegase al mercáu llaboral.

A la xabaz desindustrialización aplicada pol Estáu español n'Asturies, entamada nos años 80 del pasáu sieglu, amiéstense agora les polítiques ultracapitalistes devinientes de la Troika, nuna situación na que la falta de llibertaes democrátiques ye ca vuelta más bultable y que n'Asturies vese agravada por unes istituciones autonómiques impuestes, ensin la necesaria Soberanía política pa poder tomar midíes en defensa de los nuesos intereses colleutivos comu Pueblu Trabayaor.

Asina mesmo, tornamos a denunciar que les direiciones sindicales de los sindicatos mayoritarios son cómplices y responsables de la situación que tamos careciendo, y defendiendo l'enartamientu d'un sindicalismu alternativu nacional, que tea Asturies comu marcu específicu d'actuación, y cuya espresión más prósima agora mesmo ye'l manifestamientu convocáu por CSI, CGT y SUATEA, polo que decidimos amiestamos a la convocatoria fecha polos mesmos pa esi díi na Plaza l'Humedal de Xixón.

Per otru llau, y dientru de la dinámica de Xunidá d'Aición que vien defendiendo Andecha Astur, decidimos participar nel aconceyamientu convocáu por "La llegra" p'aniciar un bloque soberanista dientru'l manifestamientu convocáu poles organizaciones sindicales enantes nomaes cola firme voluntá d'algamar alcuerdos que permitan que toles presones y formaciones polítiques que mos consideremos dientru d'esi espaciu podamos participar conxuntamente con voz propia y afondando nel calter nacional d'esta convocatoria del primeru mayu.