La Filarmónica de Berlín, una de les orquestes más prestixoses del mundu, va crear un sellu discográficu propiu col que va empezar a editar los sos conciertos. El sellu bautizáu como Berliner Philharmoniker Recordings va editar más que nada obres sinfóniques tanto en CD como en DVD, detalló güei la orquesta al presentar el so programa de la próxima temporada.

El xefe de medios de la Philharmonie, Olaf Maninger, criticó durante la rueda de prensa que los grandes sellos se centreen en grandes estrelles y solistes, más fáciles de vender, pesie a que “les grandes sinfoníes son los sofitos d’una orquesta”.

Inda asina, la Filarmónica va siguir collaborando con sellos externos pa editar actuaciones d’artistes vinculaos a discográfiques determinaes con contratos d’exclusividá.

La serie va estrenase con una grabación de les cuatro sinfoníes de Robert Schumann interpretaes pola Filarmónica al mando del británicu sir Simon Rattle, director xeneral de la orquesta.

El nuevu sellu va permitir “ampliar y profundizar” el contactu col públicu internacional que la orquesta yá fomenta dende 2008 cola emisión de los sos conciertos en vivo al traviés de la so propia plataforma d’internet.

Según los datos actuales, cerca de 1,7 millones de persones visitaron nos últimos 12 meses el llamáu Digital Concert Hall, nel que puen siguise conciertos en vivo y consultar archivos. El portal tien 390 mil usuarios rexistraos.