El motivu de la engarraza que separtó a los premios Nobel de Lliteratura llatinoamericanos Gabriel García Márquez y Mario Vargas Llosa va dise a la tumba con ellos, dixo’l xueves l’escritor peruanu.

La discordia remóntase al añu 1976 durante un alcuentru d’escritores en México, cuando Vargas Llosa-y solmenó un certeru puñetazu al colombianu, dexándo-y el güeyu izquierdu amoratáu y finando una amistá d’una década.

El motivu de la engarraza fue un enigma pa la prensa y hasta pa los biógrafos de dambos ganadores del premiu Nobel y esti xueves Vargas Llosa dixo en Venezuela que se va llevar el secretu a la tumba.

Testigos presenciales relataron anónimamente, durante años, que García Márquez recibió’l guantazu de Vargas Llosa por “lo que-y ficiste a Patricia” (la muyer del peruanu). Una de les teoríes insinúa que l’autor de “Cien años de soledad” pudo habe-y suxeríu a Patrica Llosa que se separara del so esposu por una supuesta infidelidá d’ésti.

Otra, más enrevesada, asegura que Patricia, pa vengase del so maríu, diéra-y a entender que tuviera una rellación con Gabo. D’aquel enfrentamientu ente dambos quedó la imaxen del fotógrafu Rodrigo Moya onde García Márquez aparez col güeyu izquierdu amoratáu, pero sonriendo.