Les viñetes de Mafalda, la neña inconformista creada va 50 años pol dibuxante arxentín Quino, protagonizaron la cellebración del Día del Llibru na Unesco. La Organización de les Naciones Xuníes pa la Educación, la Ciencia y la Cultura (Unesco) promovió esta amuesa porque comparte con Mafalda “los valores que defende”, explicó’l responsable de la exhibición y axente de Quino en Francia, Fabien Gohier.

Les hestorietes de Mafalda, idealista y preocupada pola paz mundial, muéstrense nesta ocasión al traviés d’unos papeles que permiten ver la evolución del cómic dende que se publicó pela primer vez en 1964 hasta los últimos dibuxos de 1973.

La exposición ta pensada pa un públicu infantil y pa captar el so interés les viñetes seleccionaes son cencielles, llueñe de los dobles sentíos políticos, más difíciles d’entender, colos que xugaba bien de veces el so autor Joaquín Salvador Lavado, Quino.

Amás de dellos fragmentos del cómic, la exhibición introduz l’universu de Mafalda presentando al resto de personaxes: los sos padres, el so hermanu Guille y los sos amigos Felipe, Susanita, Miguelito y Libertad.

Anque les viñetes dibuxárense va ciatro décades, el mensaxe d’esta neña rebelde sigue siendo actual porque “anque los países en guerra nun seyan los mesmos, los conflictos internacionales siguen existiendo”, concluyó Gohier.