“Canción andaluza”, l’álbum de copla qu’ultimaba’l céllebre Paco de Lucía cuando falleció’l pasáu mes de febreru, va publicase’l 26 d’abril, según anunció güei la so discográfica.

L’últimu discu del astru de la guitarra flamenca, tres de “En vivo” (2011) y “Cositas buenas” (2004) –Grammy Latino al meyor álbum de flamenco-, grabóse en varies llocalizaciones, munches d’elles n’España, y taba practicamente termináu dende Navidaes, un par de meses enantes de que’l músicu sufriera un infartu masivu y mortal en México.

Nesti trabayu, que se suma a la ventena de discos propios, collaboraciones ya incluso bandes sonores del so repertoriu, da muestres del so interés pol xéneru de la copla, del que s’empapara na so infancia n’Andalucía y que, según relataría, tuviera una importancia vital na so música.

Respetáu y honráu por tol mundu de la música, ente los sos reconocimientos públicos inclúinse’l Premiu Nacional de Guitarra d’Arte Flamenco, la Medalla d’Oru al Méritu de les Belles Artes 1992 y l’honoríficu de los Premios de la Música 2002.

Premiu Príncipe d’Asturies de les Artes 2004, De Lucía fue nomáu amás fíu predilectu de Cádiz (1997) y d’Algeciras (1998) y doctor honoris causa pol Berklee College of Boston (2010).