Los almiradores des escritor xaponés Haruki Murakami precipitáronse a les llibreríes del país pa mercar el so nuevu llibru de relatos, “Onna no inai otokotachi”. Esta nueva recopilación de relatos salió a la venta en Xapón con una tirada d’aniciu de 300 mil exemplares y ye una de les novedaes editoriales más esperaes del añu y la primera obra d’hestories curties del autor en nueve años.

Anque nun se trata d’una obra dafechamente inédita, delles llibreríes abrieron especialmente a medianueche pa llanzar esta recopilación, compuesta por cinco relatos publicaos por separtao con anterioridá en varies revistes y ún inéditu. Los fidele llectores de Murakami, un autor mui apreciáu en Xapón y nel extranxeru, respondieron al llanzamientu y bien d’ellos teníen reservada la obra dende mediaos de marzu.

Tolos llibros de Murakami conviértense n’éxitu de ventes nel archipiélagu, La so última novela, “Los años de peregrinación del chico sin color”, publicáu va un añu en Xapón, fuera’l llibru más vendíu en 2013 nes islles.

Haruki Murakami ta consideráu ún de los autores xaponeses más importantes. Munchos alcuentren puntos en común col escritor colombianu Gabriel García Márquez, ún de los autores que l’autor xaponés cita cuando analiza la so propia obra. Según los sos siguidores, l’autor de llibros como “Kafka en la orilla” o “Tokio blues” ye dignu del premiu Nobel de Lliteratura.