Ismael González Arias.- El fenómenu del purismu na música asturiana, anque de xuru tendría d’esistir de más atrás, empezó a tener carta de presencia a partir de la Guerra Civil. El purista abrógase pa él mesmu’l poder moral de decidir qué ye puro, dientro del folclor, y qué yelo menos o nun lo ye. L’afán de lo puro crea alredor una ideoloxía pa defendelo: el puritanismu.

Nel ámbitu de la canción asturiana fuera onde’l purismu llegara a adquirir el másimu esplendor. El so poder llegó a ser talu que nos concursos de tonada dictaron el so orden y decidieron cualos yeren los cánones polos debía rexise tala o cuala interpretación d’una tonada.

D’esmenu, los clásicos -aquel grupu de cantadores revolucionarios de primeros de sieglu que tresformaron la tonada de la tierra de la mano d’una serie de compositores influenciaos pol nacionalismu musical-, y les sos tonaes, agora consideraes tamién clásiques, pasen a ser el patrón de midida. Dexa d’haber marxen nengún pa la creación o la improvisación: dos de los principales rasgos colos que naciera l’asturianada.

Lo puro ye un adxetivu que siempre surde a poco de ponese a falar de folclor. La eterna guerra, y les pequeñes engarradielles cotidianes, ente los defensores de la tradición y los que tan abiertos a les influencies.

La mayor parte de los estudiosos del flamenco tienen a Manuel de Falla como’l padre del fundamentalismu musical andaluz, O cuanto menos al que semara’l tarrén. Preocupáu como taba pola influencia “perniciosa” de les modes musicales del momentu nel llamáu por él flamenco “puro”, ideó’l primer Concurso de Cante Jonde de Granada, que tuvo llugar en 1922.

Según la instancia cursada al efectu’l 31 d’avientu de 1921 “...es por esta actitud de perversión estética por lo que prefiere a la cupletista al cantaor, por lo que de seguir así, al cabo de pocos años no habrá quien cante y el cante jondo morirá sin que humanamente sea posible resucitarle”. A final del documentu estampen la so firma dellos de los músicos, escritores, caderalgos y pintores de mayor sonadía del momentu.

La influencia d’esti manifiestu ye tala en too España que, malapenes unos meses depués de celebráu’l Concurso de Granada y coincidiendo coles fiestes de San Matéu d’Uviéu, celébrase ún asemeyáu na plaza de toros. Nesti casu, mesmo que pal flamenco lo ficiera Manuel de Falla, la organización cuerre al cargu d’Eduardo Martínez Torner, tando al delláu d’él personalidaes como Juan Uría, Baldomero Fernández, Aurelio de Llano...

La pureza ye, dende esti momentu, y de manera más acusada a partir de la posguerra, un conceptu abstractu que se va esgrimir reiterao. De mano, aduciendo la influencia nefasta de los aires foranos. Munchos de los xuraos de los concursos de la época, y en bona midida de los que los sucedieron, tuvieron conducíos pol afán de salvaguardar la pureza y la tradición más rancia de la tonada asturiana. Una tradición que malapenes tenía venti o trenta años. Unos cánones de pureza qu’acababen d’ellaborase.

Esti afán de purismu fue’l que llevó a la tonada asturiana al fondo de sacu nel que s’alcontró na década de los sesenta, cuando emprimaron a manifestase de manera clara los síntomes d’anquilosamientu nel que llevaba sumida tres décades: ensin innovaciones y ensin renovaciones. Cuando empezaron a usase los “cantes por” –la manera cola qu’un cantador repitía de forma idéntica la versión d’una tonada que popularizara una voz de les consideraes clásiques- y terminaron por ser la única llei pa poder participar nun concursu o pa ser consideráu un cantador a tener en cuenta.

Contra’l purismu siempre hubo voces discrepantes. Pero, nun yeren bonos tiempos pa les discrepancies. La radio, en primer términu, y los concursos, en segundu, yeren el vehículu d’espresión de mases de la tonda. Y la moda del purismu asentárase definitivamente ente nós. Una moda que, en bien de concursos y en bien de foros, apostó hasta finales de sieglu.