Por Ismael González Arias.- La zarzuela ye un movimientu musical que tuvo importancia ya influencia nun tiempu mui determináu. Nesi tiempu, dellos autores compusieron delles zarzueles ambientaes n’Asturies y, delles, inspiraes nos sos sones tradicionales. Delles zarzueles tuvieron más ésitu qu’otres. Autores como Torner intentáronlo y nun pasaron d’un escasu ésitu.

La influencia de la zarzuela na nuestra música xeneró dalgún mestizaxe. Más que nada a partir de la so so fía putativa: la copla. Un xéneru que llegó hasta los nuestros díes, dalgo p’atrás ya, de la mano de xente como El Presi, como gran figura estelar, pero que s’alvirtió la so güelga notros autores, como Antoñita Moreno, Rosa María Lobo o Vicente Díaz.

El repasu zarzueleru “Vamos p’Asturias, vamos pa Oviedo”, presentáu va pocos años nel Teatru Campoamor, tenía referencies a Asturies y contó cola dirección musical de Pablo González y la escénica d’Emilio Sagi. Lo que yá ye de por sí suficiente como p’augurar ésitu. Pero, tamién cabe destacar la importancia de les voces y de dellos otros oficios escénicos, menos conocíos, pero asgaya vistosos nuna puesta n’escena como ésta. A destacar el trabayu del escenógrafu (la cenciellez como norma) y de la figurinista (cola so visión minimalista del supuestu traxe tradicional).

Téngase en cuenta la tendencia actual del folk hacia espectáculos d’estes característiques: lo nuevo de Muyeres, lo último de Ramón Prada, les referencies d’años atrás d’Alberto Varillas na Plaza Mayor de Xixón per Begoña. La zarzuela, en particular, y modelos de dirección escénica como los d’Emilio Sagi, nun dexen de ser una bona escuela na que mirase. Non solo como asturianos. Tamién, como asturianos como él que ficieron lo que ye mester pa cualquier asturianu que quiera ser dalgo na so tierra: triunfar fuera. Con una premisa asina nun estraña a naide que tamién participara nel espectáculu del Teatru Campoamor José Ángel Hevia y la so hermana María José.

Nuevos movimientos alredor de la zarzuela tan xenrerándose n’Asturies. Tres o cuatro proyectos que, pel moemntu, nun pasen de proyectos y que col tiempu veremos si van cuayando. Y de los que siguiremos dando cuenta si lleguen a bon puertu.