Esti sábadu, 12 d’abril, los venezolanos residentes n’España ven manifestase p’amosar el so desalcuerdu cola actual política del gobiernu presidíu por Nicolás Maduro y van solicitar al presidente español, Mariano Rajoy, al traviés d’una carta abierta, un posicionamientu firme, como lo ficiera’l Parlamentu Européu, sobre la situación venezolana que vive un ambiente de tensión y conflictu social.

Les asociaciones de venezolanos, collectivos culturales y partíos políticos allugaos en toa España van realizar l’actu a les cinco de la tarde, na plaza d’España de Madrid.

Oscar Ruiz León, de l’Asociación de Venezolanos n’Alicante, y l’abogada Patricia Carrera, residente en Lleón y redactora de la carta abierta que se va entregar al presidente Rajoy, son los organizadores del actu denomináu la Mega Concentración, cola que cuiden atropar a tolos venezolanos veníos de tolos puntos d’España.

El saldu de la confrontación venezolana, que cumple dos meses esti sábadu 12, ye de 39 fallecíos (31 civiles y 8 policíes/militares), 608 feríos (414 civiles y 194 policíes/militares) y un total de 2.302 dteníos, ente los que s’alcuentren l’alcalde Daniel Ceballos, el líder Leopoldo López, el secuestru de la periodista Nairobi Pinto, la inhabilitación de María Corina Machado como diputada y decenes de desaparecíos.

La situación agrávase porque la más grande parte de los medios de comunicación sufren censura, autocensura o parcialización col réximen, dándose una falta descomanada de papel.