Por Ismael González Arias.- El musicólogu Bruno Nettl comenta, ente otros llibros nel conocíu “Música folklórica y tradicional de los continentes occidentales”, publicáu por Alianza Editorial nel añu 1985, que pue aprendese enforma tamién acerca del carácter rítmicu d’una cultura musical o d’una sola pieza de música con namás sentila. Nesti sentíu, cuidase que’l noventa y nueve per cientu de la música tradicional europea ye métrica.

Arriendes de la métrica, pola duración de les notes de la melodía, podemos alvertir el tempo de la pieza interpretada. La duración, rápida o pesada, de les notes. Dalgo que nun se tien de fiar a la subxetividá del oyente. Una jota pesada pue resultar mui rápida pa un andaluz, onde la cultura de la jota derivó hacia formes muncho más pesaes que les nomaes pesaes n’Asturies.

Tamién caracteriza en bona midida una pieza musical, amás de la métrica y la duración de les sos notes, el gradu d’acentuación d’estes notes y el númberu de melismes, notes intermedies, que s’ellaboren dende una nota a otra o sobre una mesma nota.

A esi otru unu per cientu de la música tradicional europea non métrica pertenez la tonada asturiana. Un xéneru únicu. Una pieza d’arqueoloxía musical. Una sorpresa pal oyente qu’alcuentra nella ún de los escasos xéneros llibres de cantos y que, alvierte con descomanada sorpresa, que s’afaya nel estremu occidente d’Europa y non onde podría ser más natural nos alredores del Caucasu. Y, amás, un xéneru que se caltién de manera non anacrónica nel presente, con una vitalidá impresionante (los concursos, les amueses y los festivales siguen proliferando per toa Asturies) y capacidá de renovación (nestos años vien dándose una relevu xeneracional claru).

La propia ausencia d’un ritmu internu na tonada ye falsa. El ritmu esiste, pero impríme-ylu en cada momentu y ye quién a varia-ylu, el propiu intérprete. Asina ye que dellos autores pautaron les tonaes que trescribieron axustándoles a un compás. En dellos tipos de tonaes, esti compás resuelta evidente. Pero, siempre, ye l’intérprete’l que tien capacidá asgaya como pa salise del compás y ser a marcar el so tempo propiu a les notes. El tempo de la tonada, d’una pesadez solemne, que refuerza la so brillantez nel fechu de nun tener nenguna priesa na so interpretación, llama a la calma. La mesma profusión de los sos melismes que, en determinaes modalidaes del cantu, como les ayeranes, llega hasta estremos virtuosísticos.

Esti carácter de xéneru únicu non solo ye poco conocíu n’Asturies, sinon qu’arriendes ye poco o nada esplotao como rasgu identificativu y diferencial.