Dende Conceyu Abiertu por Llangréu nun podemos pasar por altu un nuevu atentáu a la cultura ya identidá llangreana y polo tanto asturiana pola cellebración nuevamente nel conceyu d'una feria d'abril supuestamente andaluza. La feria va cellebrase ente los díes 11 y 14 d'abril nel Parque Dorado de Sama y cunta cola collaboración activa del Ayuntamientu de Llangréu. Curiosamente l'Ayuntamientu de Xixón ta ente la organización d'un eventu que vamos acoyer nel nuesu conceyu, lo que nun tien muncha lóxica.

El programa d'esti eventu pa ser una festividá típica andaluza tien delles actividaes totalmente ayenes a esa realidá y ta mui marcáu por prexuicios y topicazos. Creemos que cualesquier andaluz consciente de la so identidá sintiría vergoña al ver tal espectáculo y tamién creemos qu'hai otres cultures sobre les que realizar feries sacantes l'andaluza. Nuevamente Sama ye escenariu d'un eventu d'esti tipu ensín esistir realmente una demanda d'ello ente la vecindá de Llangréu.

Dende la nuesa formación conceyil creemos qu'esti tipu d'eventos respuenden a un enfotu consciente dende les alministraciones remanaes polos partíos españolistes n'Asturies d'imponer una cultura ayena y esborriar les nueses señes d'identidá propies. Hai un interés n'Asturies en meter a calzaor esti tipu de feries andaluces y al empar la nuesa identidá, llingua o cultura son reprimíos día tres día pol poder alministrativu y mediáticu, nun collaborando con ello en nengún casu sinon poniendo pilancos.

Dende Conceyu Abiertu por Llangréu pidimos más inversión y compromisu cola nuesa cultura propia que pasu ente pasu ta siendo desaniciada en pro de les formes culturales de les élites polítiques y económiques. Creemos tamién que instrumentalizar la cultura andaluza como instrumentu ideolóxicu pa ufrir en tol Estáu Español un modelu cultural “únicu, grande y llibre” ye una vergoña y ye una idega mui franquista.