La Conseyería d'Educación, Cultura y Deporte aprobó la programación anual de l’Axenda Didáctica Escolar, un programa xestionáu pola Dirección Xeneral de Política Llingüística cola mira de promocionar la llingua asturiana y sofitar el trabayu de los docentes de Llingua Astuirana y Gallego-asturianu.
L’Axenda Didáctica Escolar 2013-2014 incluye 182 actuaciones musicales, lliteraries o teatrales que van dexar al alumnáu esfrutar y valorar la rica creación cultural que s'espresa en llingua asturiana o gallego-asturianu. La programación d'anguaño, adaptada a les distintes edaes del públicu, va llegar nel últimu trimestre del presente cursu escolar a 137 centros de Primaria y 45 de Secundaria. Estes actividaes nun suponen costu nengún pa los centros educativos.
La selección de los proyectos fízola un equipu d'espertos en materia cultural y educativa, atendiendo a la so orixinalidá y viabilidá de desarrollu, la so adecuación a los criterios pedagóxicos establecíos nos decretos curriculares del Principáu y el so valor nel marcu del espardimientu y promoción del asturianu y del gallego-asturianu. Atendiendo a la gran demanda por parte de los centros educativos, el programa d'anguaño ye más ricu y ampliu que’l d'años anteriores, y supón una cantidá total de 135.450,30 euros (un 67,75 % más que nel pasáu cursu escolar).
