Los planos orixinales del Titanic, que fueran usaos na investigación sobre’l so fundimientu per parte de les autoridaes britániques, van ser subastaos a finales d’abril pela casa de subastes RR Auction, xuntyo cola copia que la superviviente Molly Browm entregó al capitán que los rescató.

D’alcuerdu con esta casa de subastes de Boston, estos planos, firmaos el 1 de mayu de 1912 y col sellu del astilleru Harland and Wolff, contienen anotaciones a mano qu’analicen l’impactu del iceberg sobre’l famosu tresatlánticu que’l 14 d’abril d’esi añu fundiera nes agües del Atlánticu norte y tien un preciu de salida de cinco mil dólares.

Ente les anotaciones destaca una marca na caldera númberu 6 del barcu, onde impactó contra l’iceberg, y otra nes cámares que nun fueron lo suficiente hermétiques como pa evitar que la construcción qu’apodaran como insumerxible acabara nel fondo l’Atlánticu.

Más de 1.500 persones morrieron nel fundimientu y ente los 705 supervivientes destacó Margaret Brown, conocida como “la insurxible Molly Brown”, yá que de neña sobreviviera a unes inundaciones nes que morriera tola familia y de la que se llevó la vida a un musical protagonizáu por Debbie Reynolds.

Brown entregó una copa de plata’l 29 de mayu de 1912, la Loving Cup, al capitán Arthur Rostron n’agradecimienyu al so trabayu nes operaciones de rescate a bordu del navíu Carpathia, y esi premiu va salir a subasta con un preciu de venticinco mil dólares.

Amás de los planos y la copa, RR Auction va subastar pieces de la cacía del Titanic, certificaos de descarga, la llista de supervivientes y fotografíes ya illustraciones del míticu tresatlánticu.