El voceru d'IX nel Parlamentu asturianu pide que'l PP asegure'l futuru de la hullera pública, reponga los millones de los fondos europeos que nos robaron y un plan de reactivación

Ángel González, voceru parlamentariu d'IX na Xunta Xeneral, califica de comenenciosa la carta unviada pol PP d'Asturies na que pide la retirada de los 197 despidos na empresa Hunosa, a un mes de les elecciones europees pa evitar tener que dicir que van despidir a casi 200 persones. “El PP tardó munchos meses, inclusive años, n'enterase de que convenía que nun hubiera despidos”, alvierte'l voceru,  de la qu'asegura que “oxalá lo fixera va un añu y aforráramos munchos problemes”. González espera que'l Gobiernu d'España cumpla lo que'l PP d'Asturies anuncia, pero al so xuiciu, ye tamién obligao y necesario qu'Hunosa asegure'l so futuru, non que prepare'l so zarru que ye “lo que da la sensación que quieren faer los sos dirixentes”.

Ángel González apunta que tamién hai otros aspeutos a tener en cuenta y nun escaecer: “el Gobiernu d'España tien de comprometese a reponer los cientos de millones d'euros que nos robaron, que son compromisos de planes anteriores”. “Pidimos a Rajoy que traiga lo que se llevó”, esplica.

El voceru parlamentariu d'IX apunta que la situación de les contornes mineres “ye terrible” en términos demográficos, d'empléu y de deterioru constante. “Ende hai que faer un plan especial que venimos pidiendo va años, amás de la negociación del plan d'empresa y el conveniu d'Hunosa”.

“Deseyamos que cuanto antes se llegue a un alcuerdu y vase a demostrar, una vegada más, la responsabilidá y capacidá negociadora de los sindicatos mineros n'Asturies”, conclúi González.