Más d’un cientu de periodistes venezolanos salieron del país nes últimes feches por mor de la censura y la inseguridá, d’alcuerdu col informe de l’Asociación de Periodistes Venezolanos nel Extranxeru. Bona parte d’ellos escoyeron los Estaos Xuníos, específicamente’l sur del estáu de Florida.

Sonia Osorio, presidenta d’esta organización, declaró a la Voz d’América, radio oficial americana, que dende la distancia tan viviendo la crisis venezolana: “Tamos extremando los nuestros esfuerzos pa convertinos nuna caxa de resonancia que permita difundir la realidá que vive’l país y que se trata d’ocultar con una censura de prensa”.

Osorio destacó la importancia d’internet y de les redes sociales que tan siendo parte importante durante esta crisis, onde se discuten los valores de la democracia. “Llogramos establecer una rede internacional que nos pon a toos al alcance”, dixo Osorio y afirmó qu’amás d’informar sobre la realidá en Venezuela tamién busquen la solidaridá que’l pueblu venezolnau necesita na so llucha pola recuperación de los derechos constitucionales y los valores democráticos.

L’Asociación de Periodistes Venezolanos nel Extranxeru, con sé en Miami, apoya a los sos colegues con diferentes programes pa permiti-yos una adptación a un nuevu sistema de vida, con diferente idioma y vezos.