L’escritor colombianu y Nobel de Lliteratura Gabriel García Márquez fue ingresáu va tres díes nun hospital de la ciudá de México con un cuadru de deshidratación y un procesu d’infección pulmonar y de víes urinaries, informó’l xueves la Secretaria de Salú del país. La infección pulonar ye considerada médicamente una neumonía.

L’autor de “Cien años de soledad” llevaba varies décades viviendo en México y caltuvo nos últimos años una vida reservada. Malapenes apareció ren prensa’l pasáu seis de marzu por mor de cumplir 87 años. Esi día recibió flores, pasteles y la visita de dellos amigos y siguidores.

García Márquez sintió “Las Mañanitas” fuera de la so residencia n'El Pedregal, una zona exclusiva del sur de la ciudá de México. Apareció  nun traxe negru con una camisa azul y una flor amariella na solapa, sonrió, tatexó’l cantar del cumpleaños y estrechó les manes de les visites, camarógrafos y reporteros.

García Márquez ye l’escritor más popular de la llingua española dende Miguel de Cervantes nel sieglu XVII. La so obra más conocida, “Cien años de soledad”, tien vendíos más de 50 millones de copies nel mundu y tradúxose a más de 25 idiomes. La so publicación constituyó un fitu nuna de les dos décades de más grande sonadía de la lliteratura llatinoamericana.