Frente a lo anunciao por daqué mediu de comunicación, la OLAF nun "detectó irregularidades", foi Andecha Astur quien les denunció yá en 2008.

La denuncia foi presentada por Andecha Astur en 2008 al traviés del so eurodiputáu d'Europa de los Pueblos, Mikel Irujo, y yá d'aquella anunció esti previsible desenllaz dao la evidencia fraudulenta de los fechos denunciaos.
Esti fraude agora penalizáu pola OLAF tien unes consecuencies económiques muncho más severes de les agora anunciaes, porque amás del impactu económicu pola devolución de les sovenciones, supón una perda de credibilidá de les istituciones asturianes n'Europa, que dificultará l'acesu a futures ayudes.

Andecha Astur considera d'estrema gravedá les consecuencies d'esti fraude na mayor obra en cuantu presupuestu llicitada na hestoria d'Asturies, y que de la man d'Areces y Buendía atópase enartáu nel estáu de corrución sistemática y redes clientelares aniciáu polos estremaos gobiernos PSOE-IU n'Asturies.
Anque n'Asturies estos casos de corrución son trataos poles istancies xudiciales y los medios de comunicación con escesiva benevolencia, ye nidio qu'estos fechos nun queden impunes énte les istituciones europees, ellí onde nun lleguen los tentáculos d'esta corrución.

Andecha Astur recuerda qu'esti nun ye nin el primeru nin el caberu de los fraudes denunciaos por esta organización énte la OLAF, el postrer d'ellos el de La Casa del Agua en Sobrescobiu. Denuncies que siguen el so trámite y qu'en dellos casos tenemos costancia de que yá se reclamó dende la OLAF la información pertinente a les istituciones asturianes implicaes.

Llóxicamente Andecha Astur caltendrá la so actitú coherente de denuncia d'esta trama de corrución y malversación de los recursos públicos, en defensa de los intereses d'Asturies y del Pueblu Asturianu. Nesi sen confía en meyorar la so capacidá d'actuación y denuncia nes istancies europees cola so presencia nes prósimes elleiciones europees dientru la candidatura Los Pueblos Deciden a la que les encuestes dan 1 eurodiputáu