El centru cultural de Blimea acueye la esposición del I Concursu de Fotografía “Justo Arienza” entamáu pola Asociación Cultural y de la Fiesta Plaza San Roque. La muestra presenta les semeyes premiaes d’esta primer edición del concursu xunto col restu de semeyes participantes, nes qu’apaecen estremaos requexos del pueblu de Blimea vistos dende distintes perspeutives polos sos vecinos.

Con esti concursu faise tamién un homenaxe al llabor de Justo Arienza, fotógrafu de Blimea. Fíu y hermanu de fotógrafos entamó nel mundu de la fotografía con 16 años y exerció esi trabayu hasta la fin de los sos díes.  L’amor pol so pueblu quedó espeyáu n’imáxenes de la vida cotidiana, fiestes, llugares  y escenes familiares que inmortalizó cola so cámara y qu’agora constituyen un importantísimu testimoniu de la historia del conceyu de Samartín.

La esposición va poder visitase hasta’l próximu día 11 de abril, de llunes a vienres  n’horariu de 9 a 13 h.