Na mañana del sábadu 15 de marzu Conceyu Abiertu desendolcó nel Espaciu La Llegra (CSOA La Madreña) un Conceyu Nacional monotemáticu, continuador del cellebráu’l 28 d’avientu en Noreña y empobináu a decidir la posición de la plataforma conceyil de cara a les eleiciones europees que tendrán llugar el viniente 25 de mayu.

Nesti Conceyu Nacional aldericose alrodiu’l panorama d’anguaño nel soberanismu asturianu de cara a les eleiciones europees, asina como qué papel sedría más afayaízu pa una formación de marcáu calter conceyil como ye Conceyu Abiertu.

Nesi sen, coincidiose en que la participación activa –eleutoral o non- del movimientu conceyil nesta cita namái tendría sentíu de facese dende una iniciativa soberanista xunitaria, qu’axuntara a tolos actores que formen parte d’esi espaciu políticu asturianu.

Dao qu’esi escenariu yá nun ye posible pa estes eleiciones, Conceyu Abiertu decidió nun participar nes mesmes, dando prioridá a afitar el trabayu dende la base nos conceyos asturianos. De la mesma mena, Conceyu Abiertu reafirma’l so enfotu de siguir avanzando nel procesu de xunidá del soberanismu asturianu, nel que se vien trabayando dende tiempu atrás.