Dos artistes venezolanos coinciden nuna exposición collectiva acabante d’ianugurar en La Caja del centru cultural de Chacao. Dambos inciden en que’l país convirtióse nun “Campu de fuerza”, untérminu que define un territoriu blancu d’ataques y conflictos. Los artistes son Oscar Molinari y Gabriela Gamboa.

El primeru concibe una urbe violenta gobernada pola indiferencia. La segunda amuesa una ciudá na que los sos habitantes siéntense extranxeros y hasta prisioneros nel so propiu país. Dambos creadores nun cuidaben siquiera compartir un mesmu espaciu. Tampoco exponer nestes feches. La exhibición taba pautada pa septiembre del añu pasáu.

Pero la época faise propicia. Los sos planteamientos encaxen na realidá d’anguañu: “Venezuela ye una belleza muerta, nun pues tener una vida normal, tar ayeno a lo que ta pasando”, dixo Molinari.

El tamién cineasta introduz al espectador nuna atmósfera turbia. Somórguialu nun clima de terror, agresión y sobresaltu al asitialu frente a les puertes que custodiaben delles celdes del demolíu Retén de Catia. Estructures qu’abelluguen nun cuerpu de barrotes de fierru’l rastru d’una bala. Los restos de la vieya hamaca, aguarden amarraos a una ventana diminuta que daba a los cautivos un cachín d’aire de fuera, un insignificante contactu cola realidá.

El ganador del Osu d’Oru nel Festival de Berlín (1970) conoz l’encierru. A los sos 20 años tuviera presu nel recintu, factor que-y permite recrear con precisión la vida d’un prisioneru.

Dos producciones audiovisuales y dos series fotográfiques evoquen la indiferencia. Otru videu, “Patio a Rimbaud” escenifica’l día a día nuna cárcel venezolana. El creador, cámara nes manes, percuerre una cárcel caraqueña y rinde homenaxe al poeta francés.

Na Caja2, Gabriela Gamboa concibe’l llar como una celda. La creadora recurre a una serie de televisores de distintes époques, que sintonicen los fragmentos d’un paisaxe, n’ocasiones irreconocible y distorsionáu, pero qu’acaba convertíu nuna realidá cíclica.

La exposición, en xunto, nun dexa de ser un testimoniu contemporaneu al traviés de contundentes sucesiones visuales. Una forma d’allegase a la Venezuela qu’asusta.