El referéndum previstu en Crimea’l próximu domingu 16 de marzu ye illegal, dixo la canciller Angela Merkel nuna conversación telefónica col presidente rusu Vladimir Putin, informó esti domingu’l so portavoz.

“La canciller expresó con fuerza la posición alemana qu’afirma que’l supuestu referéndum del 16 de marzu sobre Crimea ye illegal”, dixo nun comunicáu Steffen Seibert, portavoz de Merkel. “La so organización ye contraria a la Constitución ucrañana y al derechu internacional”, indicó igualmente nel comunicáu. “La canciller llamentó per otra parte que nun se rexistrara nengún avance na formación d’un grupu de contactu internacional que tien de permitir alcontrar un camín políticu que conduza a una solución al conflictu n’Ucraña”.

Merkel sorrayó la necesidá urxente de llograr nesi aspectu un resultáu sustancial. Previamente, dende Moscú, un comunicáu del Kremlin diera cuenta d’esa conversación con Merkel y otra col ministru David Cameron diciendo que Putin dixera que les autoridaes prorruses de Crimea yeren llexítimes.

Nes conversaciones con dambos intellocutores, Putin “destacó en particular que les midíes adoptaes poles autoridaes llexítimes de Crimea taben basaes nel derechu internacional”, informó’l comunicáu del Kremlin. “El presidente rusu llamó l’atención de los sos interllocutores sobre la falta de cualaquier acción de les autoridaes actuales de Kiev pa llimitar les actividaes de los ultranacionalistes y de les fuerces radicales na capital y en numberoses rexones”, señaló’l comunicáu del Kremlin.