El nivel de les voces de canción asturiana qu’algamen les fases finales ye cada vez más impresionante. Un fechu que lo demuestra ye, nel casu de los resultaos del XVII Concursu Cuenca del Caudal, la igualdá nes puntuaciones de los participantes. Hasta’l puntu que la distancia ente’l primeru y el últimu de los clasificaos ye de malapenes 9 décimes, na modalidá masculina, y de poco más d’un puntu, na modalidá femenina.

El primeru de los xuraos que s’enfrenta a les puntuaciones del pasu de les fases semifinales a les finales correspuende al XVII Concursu Cuenca del Caudal de Mieres. Pero, se siguío, sabránse les puntuaciones de los xuraos correspondientes al Concursu de la Canción de les Mines de La Nueva y del Concursu y Muestra de Folclor Ciudá d’Uviéu.

Esta igualdá nes puntuaciones fai, per una parte, que los concursos seyan bien riñíos. Y, per otra, demuestra l’impresionante nivel que tan algamando les voces asturianes. Cada ún sigue teniendo’l so favoritu indiscutible. Pero, siguiendo los concursos, alviértese que’l nivel ente les voces más moces y les voces veteranes ye cada día más equiparable.

Malapenes un puntu de diferencia nes puntuaciones fai que la competición nes fases finales se convierta nuna de les cites obligaes de los amantes de la canción asturiana, non solo nos propios llugares onde se cellebren, sinon tamién al traviés del programa SONES de TPA nes emisiones de los sábados.

Los xuraos tiénenlo difícil. Per un llau, porque les sos decisiones enxamás son del gustu de tol públicu. Y, como non, porque nestes circunstancies, escases décimes van decidir los primeros puestos. Nel fono, de too esto, quien sal ganando ye la canción asturiana. A los cantadores tóca-yos arriesgar al máximu nes fases finales.