La serie de premios recibíos pol filme “12 años de esclavitud” na gala de los Óscar, ta valiendo pal rellanzamientu de les ventes del llibru nel que se basa’l guión de la película.

Les memories de Salomon Northup, un ex esclavu del sieglu XIX, dieron un descomanáu blincu dende’l númberu 326 nel rexistru de ventes d’Amazon.com les vísperes de la ceremonia de los premios de l’Academia al llunes pela tarde en qu’algamó’l puestu 19.

La película fue dirixida por Steve McQueen y ta protagonizada por Chiwetel Ejiofor. Figuró ente les cintes más aclamaes ente les estrenes del añu pasáu y ganó l’Óscar a la meyor película, ensin dulda’l más importante de la nueche. Ye’l primer filme dirixíu por una persona de raza negra que gana’l premiu nesa clasificación.

El llibru y la película narren la hestoria del secuestru de Northup, un negru que nació llibre y que fue forzáu a la esclavitú. Por mor del éxitu de la película reavivóse l’interés pol llibru y los programes de les escueles secundaries públiques entamaron esta temporada a agregalu a les sos llistes de llectura.