El crudu Brent subía güei nel mercáu de Londres un 2,7% por mor de la tensión provocada pola intervención militar rusa na república autónoma ucrañana de Crimea. El barril de petroleu del Mar del Norte, de referencia n’Europa, subía poco enantes de les 14:00 GMT hasta 112,06 $, un 2,7% más que’l ras algamáu al pieslle del vienres.

N’apertura de güei, el crudu taba a 110,75 $, pero la inquietú sobre la situación en Crimea emburrió’l preciu al alza, según analistes llondinenses. Amás, la bolsa de valores de Londres baxaba na sesión de güei y, poco enantes de les 14:00 GMT, el so índiz principal, el FTSE-100, descendía 113,35 puntos, el 1,66%, y asitiábase en 6.696,35 enteros.

En Nueva York los precios del petroleu subíen na apertura al so ras más altu en cinco meses, ante la preocupación de los inversores poles eventuales repercusiones de la tensión ucrañana sobre’l mercáu de la enerxía.

Alredor de les 14:00 GMT, el barril de “light sweet crude” (WTI) pa entrega n’abril subía 2.06 $ el barril, nel New York Mercatile Exchange (Nymex).