España enfréntase a una virulenta crisis económica, fianciera, institucional y social ensin los deberes fechos y con negres perspectives de meyora en curtiu plazu. Ye la conclusión del llibru “Spain: What Everyone needs to Know” (España, lo que toos tienen de saber), del escritor y periodista inglés Willian Chislett.

La obra, que condensa 1.300 años d’hestoria d’España en malapenes 200 páxines y analiza dende’l puntu vista d’un extranxeru la situación actual del país, fue presentada’l llunes nel Institutu Cervantes de Nueva York nuna xornada apadrinada pol escritor español Antonio Muñoz Molina.

Chislett trata d’ufrir una visión obxetiva de la hestoria d’España dende la invasión árabe, nel añu 711, hasta anguañu col gobiernu de Mariano Rajoy. Too ello cola fin d’amosar cómo se llegó a la situación actual, qué problemes endémicos arrastra’l país dende va sieglos y delles opciones coles que podría salise de la crisis actual, que pasen por una más grande collaboración ente los partíos políticos y la consecución de pactos de gobiernu en cuestiones clave.

L’académicu Muñoz Molina, premiu Príncipe d’ Asturies de les Lletres, calificó a Chislett de “curiosu impertinente” y “gran conocedor de la hestoria y la sociedá española”, y señaló que’l so llibru “desplícanos a los españoles lo que somos y d’ónde venimos”.

L’autor de “El jinete polaco” criticó tamién que la imaxen d’España nel extranxeru tea bien de veces contaminada polos estereotipos, y recordó’l reciente artículu sobre la siesta y otros supuestos vezos españoles publicáu va unes selmanes por The New York Times. Al xuiciu d’él, textos como ési “son ofensivos y nun reflexen la realidá del país”.

Nesti sentíu, Muñoz Molina aprovechó pa referise a la “marca España”. “Suéname ridícula”, declaró, y abogó por “intentar conocenos meyor y comprender la realidá d’España” pa “desplicar meyor quién somos”.