El cantaor extremeñu Antonio Suárez Salazar, “Guadiana”, de la saga de Los Porrina, hermanu de Ramón el Portugués, sobrín de Porrinas de Badajoz, primu de La Negra y Juan Salazar, tenía de dar la tarde del domingu un conciertu nel Auditoriu Teodoro Cuesta de Mieres y que creara una gran espectación ente los afionaos al flamenco de toa Asturies.
Les entraes pal conciertu punxéranse a la venta’l vienres y al pieslle de la taquilla’l sábadu, al nun llevar vendíes más que 39 llocalidaes, el representante del cantaor decidió suspender el conciertu.
Na mesma tarde del conciertu, amás de les 39 que mercaran la entrada, alredor de 250/300 persones quedaron coles ganes d’asistir al conciertu, lo que produxo una fuerte indignación. Ente los espectadores, dellos xitanos llegaos de diversos puntos d’Asturies y de Lleón nun salíen del so asombru. Esti volumen de xente bastaría pa enllenar l’aforu del citáu Auditoriu.
Dende la dirección de la Casa de Cultura comentóse qu’esta yera la primer vez en 26 años de funcionamientu que se dexaba de cellebrar una actuación por un motivu que nun fuera estrictamente d’enfermedá, destacando la falta de profesionalidá de la empresa de representación del cantaor, que propició esta espantá de Guadiana.
Guadiana yá actuara va años con enorme éxitu nún de los actos del Día del Pueblu Xitanu cellebráu nel mesmu Auditoriu Teodoro Cuesta de Mieres. El Cantaor grabó en 1999 el discu “Cuando el río suena” y en 2002 “Brillo de luna”. Collaboró nel discu “Cositas buenas” (2004) de recientemente fallecíu Paco de Lucía. Y acaba de publicar en 2012 el so últimu trabayu, “Sonakai”, xunto a Enrique de Melchor y Tomatito, y que yera’l trabayu que diba presentar en Mieres.
