Acabada la 5ª Semifinal del Concursu Cuenca del Caudal, aconceyóse’l Xuráu integráu pola cantadora Anabel Santiago, el maestru y cantador Luis Estrada y el profesor y músicu Xaime Arias.
Cuarenta fueran los participantes nes cinco fases semifinales, depués de que 100 participaran nes rondes eliminatories. D’ellos, el Xuráu tuvo l’abegosa tarea de decidir los nomes de les 10 mueyeres y los 10 homes que pasen a les dos finales que van tener llugar el sábadu 15 y el sábadu 29 de marzu nel Auditoriu Teodoro Cuesta de Mieres, onde tamién tuvieran llugar les fases semifinales, retresmitíes pol programa SONES de TPA.
Comentaes les actuaciones y sumaes les puntuaciones, depués de más de dos hores de delliberaciones, el Xuráu decidión que pasaben a les finales les siguientes 20 voces. Les 10 de la modalidá femenina van ser: Marisa Valle Roso, Liliana Castañón, María Llatores, Belén Arboleya, Lorena Corripio, Isabel Gómez Cosío, Cristina Sánchez, Eva María Galán, María Luisa Martínez y María Teresa González Soto. Y les 10 voces de la modalidá masculina, les siguientes: Jorge Tuya, Isaac Sierra Longo, Álvaro Fernández Conde, Héctor Braga, Juan Robledo, Adolfo Uría, Esteban Verdeja, Andrés Cueli, Manuel Jesús Gómez y Gabriel González Tuya.
La XVII edición del Concursu Cuenca del Caudal tuvo organizada por l’Asociación Cultural Güeria de San Xuan y la conceyalía de cultura del Ayuntamientu de Mieres. Contó con Pablo Carrera como gaiteru oficial y fue presentáu por Sonia Fidalgo y Alberto Cienfuegos, “Michel”.
