Más de la metada de los escoceses, 53%, quier qu’Escocia continúe siendo parte del Reinu Xuníu demietres que dalgo más d’un terciu de la población respalda anguañu la so independencia, según resultaos de los últimos sondeos publicaos.

De cara al referéndum sobre la independencia d’Escocia, previstu pal próximu 18 de septiembre, la última encuenta ellaborada pola firma YouGov, difuncida güei, alcontró que’l 53% de los escoceses amuésense partidarios de que’l país nun se separte del Reinu Xuníu.

El 35% de los encuestaos amosáronse favoratibles a qu’Escocia fuera independiente, como quier el so líder, el nacionalista Alex Salmond, ministru principal escocés. Según estos mesmos resultaos, más d’ún de cada diez votantes preguntaos, el 12%, dixo tar indecisu sobre qué va votar nel pebliscitu.

Blair Jenkins, el conseyeru delegáu de la campaña pro independencia d’Escocia observó, sicasí, que nos últimos sondeos sobre esta cuestión “alviértese que l’apoyu al sí va n’aumentu demientres abaxa’l respaldu al non”.

“Frente al pasáu agostu, el sí subió siete puntos y el non baxó otros siete. El nuestru mensaxe positivu de qu’Escocia ye una nación rica y próspera y tien lo que se necesita pa ser un país exitosu y más xustu, amás, ta convenciendo cada vuelta a más xente de que tendría de ser y, dafecho, tien de ser un país independiente”, dixo Jenkins a los medios llocales.

FOT: Wikipedia