L? actu, organizáu pola Conseyeria d´Educación, Cultura y Deporte, cellebrarase ente los díes 2 y 11 de mayu

Asturies.-Depués de 35 años de celebración, la Selmana de les Lletres algamó a ser ún de los eventos más destacaos del calendariu cultural d'Asturies. Configurada como un homenaxe públicu y institucional a la lliteratura escrita en llingua asturiana y gallego-asturianu, dedicóse n'ocasiones a escritores particulares y, n'otres, garró un calter temáticu, centrándose en xéneros lliterarios como la narrativa, la poesía o'l teatru. Nel presente añu, y col lema Dibuxando un camín, va dedicase atención especial al cómic n'asturianu, coincidiendo col 125 aniversariu de la so primer manifestación: en 1889, nel númberu 1 de la revista La Comedia Gijonesa, el dibuxante Pepe Priendes publica un cuentu popular tituláu Un cuento viejo que resuelve en cuatro viñetes de forma secuencial y con testu n'asturianu a pie de viñeta. 

La Selmana de les Lletres Asturianes ye un eventu participativu, entamáu pola Conseyería d'Educación, Cultura y Deporte y nel que collaboren múltiples persones y instituciones, como la Xunta Xeneral del Principáu d'Asturies, la Universidá d'Uviéu o l'Aula de les Metáfores. Tamién participen de manera especial los centros educativos, los llibreros, los editores, y, por supuestu, los mesmos escritores, protagonistes indiscutibles d'estes xornaes.

Esti homenaxe institucional y colectivu a les lletres va llegar a tola sociedá asturiana ente'l 2 y el 11 de mayu con actos de bien diversu calter (presentaciones de llibros, llectures públiques, coloquios, certámenes escolares o conciertos musicales).

Nel marcu de la Selmana, la Conseyería d'Educación, Cultura y Deporte entama tamién el Día del Llibru Asturianu, que cada añu avera la lliteratura asturiana a más cases y más públicu: en collaboración con más de cincuenta llibreríes de la rexón, el 9 de mayu los compradores de llibros n'asturianu o gallego-asturianu van tener un 10% de descuentu y van recibir como regalu'l llibru Dibuxando un camín, qu?incluye cuatro historietes gráfiques ellaboraes especialmente pa la ocasión por Isaac del Rivero, Ruma Barbero, Javier A. Marinas y Alfonso Zapico, ganadores del Premiu «Alfonso Iglesias» de Cómic que la mesma Conseyería vien convocando dende?l 2009.