La senadora socialista Isabel Allende, fía del derrocáu presidente Salvador Allende, va convertise’l próximu 11 de marzu na primer muyer en presidir el Senáu chilenu, y va entregar la banda presidencial a la presidenta electa Michelle Bachelet.

El bloque de centruizquierda Nueva Mayoría algamó esti xeueves un alcuerdu pa nomar a la senadora como presidenta de la Cámara Alta a dos selmanes de que’l nuevu Congresu asuma les sos funciones.

Amás, Allende va ser la encargada d’entregar simbólicamente la banda presidencial colos colores azul, blanco y roxo a la siguiente mandataria, Michelle Bachelet, nel momentu de la so asunción na sé del Congresu en Valparaísu’ñ próximu 11 de marzu.

Bachelet, la primer muyer n’algamar la presidencia chilena en 2006, ye fía d’un xeneral d’aviación que morrió tres del güelpe d’estáu poles tortures de los sos propios subalternos, acusáu pola dictadura de traición por mantenese fidel al Gobiernu d’Allende.

El presidente socialista Salvador Allende fue derrocáu nun güelpe d’estáu militar llideráu por Augusto Pinochet el 11 de septiembre de 1973, día nel qu’Allende punxo fin a la so vida, convirtiéndose nun mitu del socialismu mundial.