Los sirios desplazaos pola guerra civil nel so país tan a puntu superar a los afganos como la más grande población de refuxaos del mundu, según informaron esta mesma selmana les Naciones Xuníes.

El comisariu pa los refuxaos, Antonio Guterres, describió un escenariu de devastación y crisis humanitaria durante una videoconferencia ante l’Asamblea Xeneral. “Va cinco años Siria yera’l segundu país del mundu qu’agospiaba más refuxaos. Agora los sirios tan a puntu suplantar a los afganos como la más grande población de refuxaos del mundu”, dixo Guterres. “Ruémpeme’l corazón cómo esta nación que recibiera refxaos d’otros países durante décades fuerza agora a los délla al exiliu”, agregó.

Esti responsable pidió un fuerte apoyu internacional pa los países vecinos de Siria que sufren el costu enorme que supón recibir a cientos o miles de ciudadanos sirios día tres de día.

Pa un país pequeñu como’l Llíbanu, la carga equival a la llegada de 15 millones de refuxaos a Francia, 32 a Rusia o 71 a los Estaos Xuníos, aporfió Guterres. Según el Bancu Mundial, la crisis siria diba poder costar a Llíbanu 7.500 millones de dólares.

Guterres pidió a la comunidá internacional, especialmente a los países que tan fuera de la rexón, qu’ufierten facilidaes a los refuxaos sirios, como puen ser los visaos de residencia.