La cueva d’Altamira, una xoya del arte rupestre del Pelolíticu superior, va abrir les puertes a les visites, de forma restrinxida, temporal y experimental, el xueves que vien en grupos de cinco persones a la selmana lo que va servir pa estudiar l’impactu sobre les pintures.

Depués de doce años trancaes al públicu por mor de la fraxilidá de los debuxos, el Ministeriu d’Educación, Cultura y Deportes informó güei, nun comunicáu, de l’apertura de la cueva, como decidiera’l Patronatu d’Altamira nel so caberu aconceyamientu.

El xueves que vien van entrar a la cueva los primeros visitantes, que se van seleccionar de forma aleatoria ente’l públicu que pase esi día pol muséu nes primeres hores de la mañana. Les visites a Altamira van axustase a un protocolu d’accesu que desixe, ente otres coses, utilizar monos desechables, gorru, mascarilles y calzáu especial que’l muséu va facilitar a los visitantes. La estancia na cueva va durar 37 minutos, siguiendo un itinerariu qu’establez los tiempos que se va permanecer en cada ún de los espacios.

Enantes d’entrar, los visitantes van conocer los detalles de la so participación nel programa científicu y les normes que tiene de siguir dientro de la cueva, onde nun van poder tocar la roca nin tomar imáxenes. Y a la salida, estes persones van tener de facilitar al equipu científicu información sobre la so experiencia.

Les visites van desarrollase hasta’l mes d’agostu y calcúlase que nesti tiempu van poder entrar 192 persones a la cavidá. Estes visites formen parte del programa d’investigación pa la consevación preventiva y de réximen d’accesu a la cavidá, que se punxera en marcha en 2012 baxo la dirección científica del expertu Gaël de Guichen. El xueves, esti expertu va impartir una conferencia titulada “Altamira güei”, a les siete la tarde, na Facultá de Ciencies de la Universidá de Cantabria.