El movimientu islamista Hamas, que gobierna en Gaza, pretende privatizar la xestión de los pasos fronterizos con Israel y Exiptu pa facer frente al deterioru económicu al que fai frente la Franxa, baxo asediu del Exércitu israelí dende 2007. Una idea que los empresarios creen acertada, pero que ven cásique imposible de cumplir demientres nun se materizalice la reconcialiación de les facciones palestines, estancada dende 2012 y que nos últimos meses tanto Hamas como l’Autoridá Nacional Palestina traten otra vuelta de facer progresar, anque ensin munchu éxitu.

En declaraciones a la prensa, Alla Rafati, ministru d’Economía del Gobiernu de Hamas, desplicó que l’obxetivu ye entregar el manmtenimientu y l’alministración de los pasos a un empresariu de Gaza, al tiempu que’l Gobiernu llimítase a llexislar y vixilar el correctu funcionamientu del procesu.

Nesti sentíu, el responsable reveló que los planes tan enforma avanzaos y que’l so ministeriu yá falara con diferentes miembros del sector priváu pa estudiar y concretar un mecanismu de trabayu.

Gaza ta sometida a un estrenchu cercu militar istraelí dende qu’en 2007 se ficiera col control de la Franxa tres d’una sangrienta batalla coles milicies de l’Autoridá Nacional Palestina, quedando la so autoridá relegada a Cisxordania. Anque dende 2010 esi asediu aliviárase pasu ente pasu, Hamas quéxase de qu’Israel namás permite la entrada del 40% de los productos básicos que necesita la población y mantién restrinxida la entrada de materiales de construcción y de materies primes pa la industria.

La situación ye tan complexa que responsables del sector priváu en Gaza dulden de que’l plan expuestu pol movimientu islamista pue aportar a bon puertu demientres nun se consiga enantes la reconcialiación de les facciones palestines.