A les 12.45 d’esti martes, el coordinador nacional de Voluntá Popular, Leopoldo López, al que les autoridaes venezolanes culpen del clima xeneráu poles últimes manifestaciones populares, avanzó hasta’l piquete de la Guardia Nacional y entregóse, depués de dirixir un discursu a les miles de persones que se congregaran nel so apoyu na plaza Brión, dende tempranes hores del martes.
Tres de recibir un besu y un crucifixu de la so muyer, Lilian Tintori, el líder políticu púnxoswe a disposición de les autoridaes, pesie a ser consciente de que s’entrega a una xusticia “corrupta”, según les sos palabres.
Durante’l so discursu, señaló que debe construyise una salida “que tien de ser pacífica, dientro de la Constitución, pero na cai. Yá nun nos queden en Venezuela medios llibres pa poder expresanos y si los medios callen, tenemos de diar a les cais”.
“Tenia la opción de dime, pero nun me voi dir de Venezuela enxamás, la otra opción yera quedar escondíu na clandestinidá y nun tenemos nada qu’esconder”, sentenció. Expresó tamién que “si’l mio encarcelamientu permite a Venezuela esconsonar definitivamente y pa los venezolanos que naguamos por un cambiu, el mio encarcelamientu va pagar la pena”.
López aportó a les 11:56 a la Plaza Brion de Chacaíto. Vistíu de blanco y cola bandera de Venezuela nes sos manes, saludó a les persones que se concentraron pa respaldalu, Tres de la so llegada, los asistentes entonaron les notes del Himnu Nacional.
Minutos enantes de presentase en Chacaíto, López señaló al traviés de la so cuenta de twitter que nun diba arriesgar a nadie, que diba averase al piquete y ellí diba pasar solu como-y lo pidieran. “Nun voi arriesgar a nadie, nun caigamos na violencia”, pidió.
Reiteró que ye inocente y nun tien que temer. “Siempre voi dar la cara. La mio familia y vosotros, son la mio fuerza pa lluchar (…) Desconéctome. Gracies Venezuela. El cambiu ta en cada ún de nosotros. Nun nos rindamos. Yo nun lo voi facer”, finalizó.
Depués de les 12:40h, Leopoldo López fue tresfiríu d’una tanquerta de la Guardia Nacional y a una camioneta negra 4x4 de placa AA713HP Edo Zulia. El vehículu, según se pudo conocer al través de comentarios d’una radio local, dio varies vueltes enantes d’aportar a la 1:30 de la tarde al sector El Rosal.
