La Xunión Europea suspendió indefinidamente les negociaciones con Suiza sobre la so participación en dos programes d’investigación, primer indiciu del empeoramientu de les rellaciones tres un referendu nel país helvéticu que llimitó la inmigración.
El 9 de febreru, los votantes suizos aprobaron por estrenchu marxen un plan pa llimitar la inmigración de tolos extranxeros, incluive los ciudadanos de la Xunión, nun plazu de tres años.
La portavoz de la Xunión, Pía Ahrenkilde Hansen, dizo esti llunes que les conversaciones fueron suspendíes hasta qu’hubiera un indiciu claru sobre como piensa respetar Suiza’l tratáu que garantiza la llibre circulación de ciudadanos ente la Xunión Europea y la Confederación Helvética.
Agregó que Suiza informó a la Xunión Europea que nun va conceder llibertá de movimientos a los ciudadanos del últimu miembru de les 28 naciones del bloque, Croacia, obligando a Bruxelles a suspender les negociaciones sobre les beques d’investigación Horizon 2020 y el programa d’intercambiu académicu Erasmus
