Caracas alboreció güei tensa polos manifestantes asesinaos ayeri, polo menos tres, arriendes de decens de feríos, durante los disturbios ocurríos na marcha convocada pola oposición pa pidir la lliberación d’estudiantes del Táchira, al oeste de Venezuela, que fueron encarcelaos por orden del presidente Nicolás Maduro.

Nun se sabe de cierto la identidá d’ún de los fallecíos y por eso dellos dulden si fueron dos o tres los muertos d’ayeri tres de concluyir la descomanada manifestación de protesta de la oposición. Tres de la manifestación na Plaza Venezuela los estudiantes marcharon pacíficamente a la Fiscalía Xeneral pa solicitar la llibertá de los xóvenes presos. Al acabar l’actu y retirase de la Fiscalía los estudiantes fueron emboscaos por grupos oficialistes armaos, nomaos collectivos 23 de Xineru.

L’estudiante Bassil Alejandro D’Acosta Frías, de 24 años, alumnu de la Universidá Alejandro de Humboldt, morrió por un disparu na cabeza. Aparecieron d’esmenu unos tipos vistíos de negro y a cara descubierta disparáron-y.

El segundu fallecíu ye Juan Montoya, de 40 años. Recibió dos tiros: ún na cabeza y otru en pechu. Yera funcionariu de de Policaracas y miembru del collectivu Leonardo José Pirela de la populosa barriada caraqueña 23 de Xineru. El presidente Maduro refirióse a Montoya como ún amigu d’él y el presidente Diosdado Cabello calificólu de bon revolucionariu.

La xornada de protesta concluyó con disturbios na nueche en Chacao, la zona más chic de Caracas, onde los collectivos oficialistes intentaron saquear tiendes y quemar neumáticos. Equí rexistróse’l tercer muertu según anunció nel so twiter l’alcalde Ramón Muchacho.

En consecuencia, el secretariu executivu de la Mesa de la Unidá Democrática, Ramón Guillermo Aveledo, condenó ensin reserves la violencia d’ayeri y anunció que l’alianza opositora alcordó tres díes de duelu polos fallecíos y pidió una investigación obxetiva.

Maduro reconoció qu’hubiera pequeños grupos d’infiltraos na manifestación de la oposición que cuasaron destrozos y actos vandálicos nel edificiu de la Fiscalía. El presidente culpa a la oposición y al imperiu de los Estaos Xuníos de conspirar escontra él y pretender un supuestu güelpe d’estáu.

Asinamesmo, el Serviciu Bolivarianu d’Intelixencia, la policía política, ordenó la captura del ex alcalde de Chacao, Leopoldo López, por ser el presuntu responsable de los fechos violentos d’ayeri.

Polo pronto l’alcalde chavista Jorge Rodríguez convocó pa güei uan marcha a favor del gobiernu. De xuru que nesti casu nun va necesitar de l’autorización oficialista pa llevala al acabu.

Video: Cooperativa.CL.