Una esquiadora llibanesa participante nos Xuegos de Sochi dio bien que falar estos díes, pero non polos sos resultaos, sinon por publicar n’internet un videu nel qu’aparez con mediu cuerpu desdnudu, lo que llevó al so país a reclamar una investigación.

Nel videu, que fuera de mano publicáu en youtube y propagóse aína al traviés de twiter y facebook, Jackie Chamoun, de 22 años, aparez col entamu al aire y vistida namás con una braguina nunes imáxenes tomaes durante una sesión de fotografíes pa un calendariu.

Na imaxen qu’aparez nel calendariu la esquiadora tapa los pechos colos esquís. Tres d’un ábanu de comentarios na rede, tanto crítiques como eloxoses, la especialista n’eslalon excusóse na so páxina de facebook polo qu’ocurriera, asegurando que namás autorizara la difución de les fotos, non del videu.

El ministru de la Xuventú y Deportes del Llíbanu, Faycal Karamé, reaccionó pidiendo midíes al Comité Olímpicu Llibanés col obxetivu de protexer la reputación del país, según les sos propies palabres. Pola contra, Chamoun, que yá compitiera nos Xuegos de Vancouver 2010, recibió munchos mensaxes d’apoyu al traviés de les redes sociales.