“Señores, The Beatles”. Asina d’escuetu fue Ed Sullivan al presentar va 50 años al cuartetu británicu a los telespectadores de los Estaos Xuníos, onde esti fin de selmana cellebróse en bien de llugares la herencia musical que sobrevivió al pasu del tiempu. El debut en directo de la banda aquel domingu 9 de febreru de 1964 nel programa de televisión “The Ed Sullivan Show” atraxo una audiencia récor de 73 millones d’espectadores y catapultó al grupu a la fama a esi llau del Atlánticu.

Fue un españíu d’emoción collectiva que llevó a toa una xeneración a perder el recatu, según el periodista Larry Kane, l’únicu qu’acompañó a los cuatro de Liverpool en toles paraes de les sos xires pelos Estaos Xuníos en 1964 y 1965.

The Beatles aterrizaran ellí pocos díes depués de que “I Want to Hold your Hand” esguilara al númberu ún de les llistes musicales gracies a los xefes de Capitol Records qu’invirtieran la suma ensin precedentes de 40 mil dólares pa propmocionar la banda, convencíos del talentu d’aquellos xóvenes.

La so llegada allanó’l camín a otres bandes del Reinu Xuníu nos Estaos Xuníos, no que pasaría a conocese como “la invasión británica”, qu’axudó tamién a dar visibilidá a artistes afroamericanos marxinaos nun país segregáu. The Beatles, The Rolling Stones y la más grande parte de les bandes britániques fueron les primeres en dicir que munchos de los artistes afroamericanos fueran una inspiración pa ellos.

The Beatles recharazon la marxinación cuando n’agostu de 1964 dixeron que se diben negar a actuar nel estadiu Gator Bowl de Florida si se segregaba a l’audiencia. La so desixencia fizo que pela primer vez blancos y negros sentaran xuntos nel estadiu.

FOTO: Wikipedia