Esti llunes, 10 de febreru, entama una de les grandes cites de los aficionaos a los deportes de montaña d’Asturies, les Xornaes de Montaña de Mieres. 25 años depués de la so primer edición, l’alcuentru céntrase nesta edición, de manera cásique monográfica, na bicicleta de montaña.

El preámbulu de les Xornaes tuvo llugar la pasada selamana colos XVII Alcuentros de Senderismu de Turón, una cita na que presentaron les sos actividaes el fotógrafu Carlos Salvo, con un percorríu pel Camín de Santiago dende Lleón a Compostela, l’equipu Cuentatrás Team MTB, con otra forma de ver la montaña dende la so bicicleta, el guía y responsable de refuxos de montaña Joaquín Álvarez, y l’últimu día’l tamién guía montañeru de la empresa tocandocumbre.com, Juan Menéndez Granados, con una relación de les sos actividaes de guía al traviés del mundu.

Esti llunes subiráse al escenariu del Auditoriu Teodoro Cuesta l’expertu n’escalada en bloque, Manuel Álvarez Ramos. El martes, Víctor Guerra, va dar la so visión sobre los últimos 25 años de la bicicleta de montaña n’Asturies. El miércoles asistiremos a la estrena de la película “The Art of Fligt”, de Travis Rice, una oportunidá única pa los amantes del snowboard. El xueves la escaladora asturiana Rosa Fernández presentará la so actividá de bicicleta de montaña pela cordelera del Atlas. Y, el vienres, como pieslle de les Xornaes, Juan Menéndez Granados, acabande d’aportar de l’Antártida, onde acaba d’algamar el Polo Sur en bicleta, va dar la so primera proyección sobre esta experiencia única.

Toles actividaes de les Xornaes de Montaña van tener llugar a les ocho de la tarde, nel Auditoriu Teodoro Cuesta de Mieres del Camín, con entrada llibre.