Alredor de 500 pelegrinos sellaron la so credencial certificando que ficieran la variante del Camín de Santiago que xune Lleón con Uviéu, siguiendo la vieya creyencia qu’indicaba que “el que visita Santiago y nun visita El Salvador, visita al criáu y olvida al Señor”.

Les etapes ente Lleón y Pola L.lena nun rexistren, polo xeneral, nengún comentariu críticu, salvo la dificultá grande de la etapa previa al puertu Payares, una de les de más grande desnivel de toles que cubren les diferentes rutes a Santiago.

Pero, pola contra, la etapa que xune Pola L.lena y Mieres, nel tramu que xune Pola con Uxo, entraña pa los sos usuarios graves peligros al circular xunto a l’antigua carretera nacional 630, ensin camín nin siquiera arcén. Esta falta d’arcén lleva a que vien de pelegrinos denuncien la falta de respetu a los cientos d’usuarios qu’añalmente circulen per esta ruta.

Depués, dende Uxo pue garrase la sienda’l ríu Caudal hasta aportar a la villa de Mieres del Camín y al so agospiamientu de pelegrinos de La Peña, a dos kilómetros del centru y en ruta hacia la última de les etapes.

Esta última etapa, de malapenes 17 kilómetros dende La Peña a Uviéu tamién entraña peligros yá que, sube tamién pela carretera nacional 630 la cuesta de La Rebollá hasta El Padrún. Un total de cuatro kilómetros duros que, ensin arcén, vuelven a enllenar de complicaciones a los usuarios según los comentarios que depués reflexen nos llibros d’incidencies de los agospiamientos.

Notros tramos de les estremaes rutes a Santiago, peligros asemeyaos pola coincidencia de los caminos coles carreteres fueron solucionaos cola incorporación d’arcenes o, como meyor solución, la creación d’un camín paralelu. Una opción que nun se ve nada díficil ente Pola y Uxo, y muncho menos pa salvar los cuatro kilómetros ente La Peña y l’altu El Padrún.