El llexendariu fotógrafu Sebastiâo Salgado va cumplir 70 años esti sábadu disfrutando del éxitu mundial de la so obra más reciente, “Génesis”, y con planes d’entamar un nuevu trabayu na Amazonia brasileña.

“Génesis”, qu’abarca 245 fotografíes en blancu y negru de requexos preservaos del planeta, fue un xiru más na carrera de Salgado, que se ficiera famosu por rexistrar cola so cámara traxedies humanes como’l drama de los desplazaos (“Exoso”) y la miseria nel África Subsahariana (“Sahel, el Fin del Camino”).

Pa Salgado, el percorríu d’ocho años per 32 países pa rexistrar los llugares nos que la Tierra sigue siendo como yera nes dómines primeres fue tamién un viaxe d’autoconocimientu y una toma de conciencia sobre la necesidá de detener el ritmu aceleráu de destrucción ambiental.

Dende’l llanzamientu de “Génesis”, les impresionantes imáxenes rexistraes por Salgado percuerren el mundu –agora mesmo tan expuestes en Madrid y en Venecia- y son, pa munchos, el puntu cimeru de la carrera del economista que s’autodescubrió como fotógrafu en 1973, de la que trabayaba pa la Organización Internacional del Café (OIC), en Londres.

An entamar la so octava década de vida, Salgado nun piensa na xubilación, y yá prepara un nuevu proxectu: “Tengo ganes de facer un trabayu na Amazonia”, reveló nuna entrevista reciente.