Un día enantes de que los Xuegos Olímpicos d’Iviernu de Sochi queden oficialmente inauguraos, dos componentes del grupu Pussy Riot desafiaron la nueche del miércoles al presidente rusu, Vladimir Putin, al qu’alvirtieron que nun van perdonar, durante un conciertu en Nueva York xunto a Madonna.

“Nun vamos perdonar y nun vamos escaecer lo que’l réximen fai a los nuestros conciudadanos. ¡Desiximos una Rusia llibre!”, proclamó Nadejda Tolokonikova, poco enantes de cantar con Maria Alejina delantre de milenta espectadores.

Los Estaos Xuníos son la última etapa de la xira internacional d’Alejina, de 25 años, y Tolonikova, de 24, iniciada poco depués de ser lliberaes n’avientu tres de pasar 21 meses preses. Tres Pussy Riot –el grupu tien un númberu fluctuante de componentes qu’enxamás fue reveláu- fueron encarcelaes por cantar en febreru de 2012 una misa punk escontra Putin na catedral del Cristu Salvador de Moscú.

El conciertu en Nueva York, organizáu por Amnistía Internacional, axuntó a importantes figures de la música como Madonna, la qu’aseguró que fuera amenazada de muerte tres d’apoyar públicamente a les Pussy Riot nuna actuación qu’ufiertó na capital rusa n’agostu de 2012.