La Casona del Bravial celebra esti mes de febreru’l so cuartu aniversariu como centru cultural, y va facelo contando la historia d’un edificiu que ta mui lligáu a la so propia esistencia. Ente los sieglos XI y XII la familia Fernández Miranda, procedente del conceyu de Quirós, asentábase na Casona del Bravial. Tiempu dempués, nel añu 1496, descendientes d’esa mesma familia treslladaríen la so residencia a la casona de La Cabezá, que munchos sieglos dempués va  convertise nel conocíu como Castiellu de Blimea, al que-y dará forma en 1897 el Vizconde de Campogrande nun intentu de revivir les vieyes glories medievales.

La esposición, baxo’l títulu “El Castiellu de Blimea. Historia, lleendes, abandonu”  fai un percorríu pela historia del edificiu y les families que lu habitaron basándose en datos bibliográficos, documentos antiguos y semeyes. De dalgún mou esta esposición pretende ser un homenaxe a un edificiu que tovía recuerden con munchu afeutu los vecinos de Blimea, y una manera de dexar constancia del so valor históricu.

La esposición inaugúrase esti xueves 6 de febreru a les 7 de la tarde y va contar cola presencia de la conceyal de Cultura del conceyu de Samartín, Gema Suárez Torre, que va tar acompañada pola historiadora que llevó a cabu’l trabayu de recoyida y escoyeta de los materiales, Belén González Collado. L’actu va tar abiertu a toes aquelles persones que quieran asistir. La esposición va poder visitase hasta’l 7 de marzu de llunes a vienres n’horariu de 9 a 13 h.

Entamen asina les actividaes programaes pa celebrar esti cuartu aniversariu de la Casona del Bravial, que van siguir el próximu día 21 de febreru cola celebración del Día de la Llingua Materna, fecha na que se va llevar a cabu un taller esplicativu d’edición de la Wikipedia n’asturianu.