Julie Gayet, a la que se-y atribúi un romance col presidente de Francia, François Hollande, va compitir por un César a la meyor actriz secundaria pol so papel na sátira política “Quai d’Orsay”, dirixida por Bertrand Tavernier.

Gayet encarna nesa cita a una seductora conseyera política sobre África na oficina d’un ficticiu ministru d’Exteriores de Francia qu’aspira a llograr el Premiu Nobel de la Paz. La película, basada nun exitosu cómic d’Abel Lanzac y Christophe Blain, narra les peripecies d’un ficticiu xefe de la diplomacia gala, inspirándose nel conservador Dominique de Villepin.

El 28 de febreru nel Teatru Chatelet de París sabráse si Gayet se lleva la que sedría’l so primer César, pol que compiten tamién Marisa Borni, por “Un château en Italie”, Françoise Fabian, por “Les garçons et Guillaume, à table”, Adèle Haenel, por “Suzanne”, y Géraldine Pailhas, por “Jeune & Joilie”.

La nominación de Gayet produzse xusto cuando se cumplen tres selmanes dende qu’una revista del corazón aireara’l supuestu romance con Hollande. Esa aventura, nin confirmada nin desmentida polos sos protagonistes, propició la ruptura d’Hollande cola primera dama, Valérie Trierweiler, pero’l presidente de Francia nun esclaró si mantién una rellación con Gayet, a la que los medios franceses yá se refieren como la segunda dama.